चैत १२ गते हुने भोजपुर ट्रेल रेस प्रतियोगितामा सहभागिताको लागि आह्वान
- खेलकुद
- March 17, 2022
३ चैत, भोजपुर । भोजपुरको पौवादुङ्मा-५ सानोदुम्मामा ट्रेल रेस प्रतियोगिता हुने भएको छ ।
मिरा राई फाउण्डेशनको आयोजनामा अन्तर्राष्ट्रिय ट्रेल रेस प्रतियोगिताबाट मान्यता प्राप्त भोजपुर ट्रेल रेस प्रतियोगिताको पाँचौ संस्करण यहि चैत १२ गते हुने भएको हो ।
विश्व अन्ट्रा धाविका मिरा राईको जन्म गाउँमा हुन लागेको उक्त प्रतियोगितामा सहभागिताको लागि इच्छुक धावक, धाविकालाई अनुरोध गरिएको छ ।
प्रतियोगितामा बालबालिकालाई पनि समावेश गरिने फाउण्डेशनका सचीव केशर राईले जानकारी दिए ।
उनका अनुसार १० बर्ष सम्मका बालबालिकाले ४ किलोमीटरको रेसमा सहभागी हुन पाउने छन् ।
त्यस्तै पौवादुङ्मा गाउँपालिकाका स्थानीयले १० किलोमिटरको रेसमा सहभागी हुन पाउने छन् ।
प्रतियोगितामा मुख्य प्रतिस्पर्धा ५० किलोमीटरको हुनेछ । उक्त रेस विभिन्न वडा, गाउँपालिका हुदै शुरुवात विन्दुमा पुगेर नै ५० किलोमिटर समापन हुनेछ ।
उक्त रेस प्रतियोगितामा महिला र पुरुषले आ-आफ्नो समुहमा प्रतिस्पर्धा गर्नेछन् ।
प्रतियोगितामा पुरुष तथा महिला दुवैतर्फ प्रथमलाई नगद ५० हजार, दोस्रोलाई ३० हजार, तेस्रोलाई २० हजार,चौथोलाई १० हजार र पाँचौलाई ५ हजार पुरस्कार प्रदान गरिने छ ।ब
त्यस्तै स्थानीयहरुको लागि १० किलोमीटरको रेसमा पुरुष तथा महिला दुवैतर्फ प्रथमलाई १० हजार, दोस्रोलाई ५ हजार र तेस्रो हुनेलाई ३ हजार नगद पुरस्कार प्रदान गरिने आयोजकले जनाएको छ ।
सहभागीलाई खाना तथा आवासको समेत व्यवस्था गरिएको आयोजकले जनाएको छ । 
