पोखरामा राष्ट्रिय युवा संघ नेपालको १०औँ महाधिवेशन सुरु

पोखरा, वैशाख १० – नेकपा एमालेको जनसंगठन राष्ट्रिय युवा संघ नेपालको १०औँ महाधिवेशन आजदेखि पोखरामा सुरु भएको छ। अमरसिंह चौरमा हुने उद्घाटन सत्रलाई प्रधानमन्त्री तथा एमाले अध्यक्ष केपी शर्मा ओलीले सम्बोधन गर्नेछन्।

अध्यक्ष पदका लागि क्षितिज थेबे, सुमन पुरी, महाराज गुरुङ, प्रकाश गौतम र कृष्णहरि केसीले आकांक्षा व्यक्त गरेका छन्। सर्वसम्मत नेतृत्व चयन गर्ने प्रयास भइरहेका बेला निर्वाचन हुने सम्भावना कम देखिएको छ।

महासचिव पदमा उपसचिव राजन थापा र सचिव निरोज पौडेलसहित केही नेताको चर्चा छ। खुला उपाध्यक्षमा राकेश राई, ध्रुव खड्का, मोबिन आलमलगायतको र महिला उपाध्यक्षमा शारदा पछाईं, निशा लिम्बु, अनुपमा राईहरूको नाम अगाडि आएको छ।

बन्दसत्र आज साँझ पोखरा सभागृहमा सुरु हुने तयारी छ।