हतुवागढीको १, २, ८ र ९ वडाको मतगणना सम्पन्न, पालिका प्रमुखमा एमाले र उपप्रमुखमा गठबन्धन अगाडी

घोडेटार । भोजपुरको हतुवागढी गाउँपालिका अन्तर्गतका ४ वटा वडाको मतगणना सम्पन्न भएको छ ।

आइतबार (आज) बिहान ३:५७ सम्म हतुवागढी गाउँपालिका १, २, ८ र ९ नम्बर वडाको मत गणना सम्पन्न भएको हो ।

मतगणना सम्पन्न वडा मध्ये वडानम्बर १ मा एमाले उम्मेदवार कुमार बिष्ट, २ नम्बर वडामा एमाले उम्मेदवार बिचारी थापा, ९ नम्बर वडामा एमाले उम्मेदवार सन्जल राई र ८ नम्बर वडामा नेपाली कांग्रेसका उम्मेदवार प्रेमबहादुर थापा वडाध्यक्ष पदमा निर्वाचित भएका छन् ।

हालसम्मको नतिजा अनुसार नेपाली कांग्रेसले वडा नम्बर ८ मा प्यानलै विजयी भएको छ भने वडा नम्बर १ को महिला सदस्यमा विजयी भएको छ । त्यस्तै नेकपा एमालेबाट वडा नम्बर २ र १ मा प्यानलै विजयी भएका छन् । वडा नम्बर १ मा भने महिला वडा सदस्य बाहेक वडाध्यक्ष सहितका सदस्य पदमा नेकपा एमालेका उम्मेदवार निर्वाचित भएका छन् ।

हाल वडा नम्बर ७ र वडा नम्बर ३ को मत गणना भइ रहेको छ ।

पालिका प्रमुखमा एमाले र उपप्रमुखमा गठबन्धनको अग्रता

४ वटाको मतगणना सम्पन्न हुँदा पालिका प्रमुखमा एमालेका उम्मेदवार प्रेमकुमार राई र उपप्रमुखमा गठबन्धनको उम्मेदवार सुनिता किरातीको अग्रता कायम रहेको छ ।

हाल सम्मको मतगणना अनुसार पालिका प्रमुखमा एमाले उम्मेदवार राईको १७३२ र गठबन्धनका उम्मेदवार गजेन्द्र बहादुर कार्कीको १६३८ मत रहेको छ । त्यस्तै उप प्रमुखमा एमाले उम्मेदवार कमला राईको १५१० र गठबन्धन उम्मेदवार किरातीको १८०४ मत रहेको छ ।