चुवार, कोप्चे- घोडेटार यातायात भाडा व्यवस्थापन लगायतका ७ बुँदे माग सम्बोधन गर्न स्थानीयको माग

-अर्जुन राई अपहेलित 

९ असोज, घोडेटार । भोजपुरको हतुवागढी गाउँपालिकाको ४ वटा वडाको स्थानीयले यातायात भाडा व्यवस्थापन लगायतका ७ बुँदे माग गरेका छन् ।

आइतबार गाउँपालिकाको वडा नम्बर ४, ७, ८ र ९ का स्थानीयहरुद्वारा आयोजित डाँडाखर्कको भेलाले उक्त निर्णय गरेको हो ।

दसैं तिहार नजिकिए सँगै गाउँ फर्किनेहरुको बढ्दो क्रम रहेको छ । यातायात व्यवसायीहरुले तेलको मूल्य बढेको तथा बाटो बिगि्रएको कारण देखाउँदै मनोमानी भाडा असुल गर्ने गरेको स्थानीयको गुनासो छ ।

चुवार तथा कोप्चेबाट ज्यामिरे, सापिन्टार, रोक्टाङ, पात्लेपानी, खैराङ लगायत बीचबाटोमा ओर्लिनु परे घोडेटार सम्मको पुरै भाडादर तिर्नु परेको स्थानीयबासीहरुको गुनासो छ ।

समय तोकेर नियमित यातायात सञ्चालन गर्नुपर्ने, दुरीको हिसाबले भाडादर कायम गरिनुपर्ने, रिजर्भको नाममा १०/१२ जनाको भाडा तिर्नु पर्ने व्यवस्थाको अन्त्य, यात्रीलाई यातायात प्रालिको नाम, गाडी नम्बर र भाडादर सहितको टिकटको व्यवस्था, हतुवागढी यातायात प्रालीले धरान-चतरा-कोठु हुँदै चुवार सम्मको भाडा मनपरी लिएको हुँदा बढीमा ५००/- मात्रै कायम गर्नु पर्ने लगयतको माग सहित गाउँपालिकामा माग पत्र बुझाइएको हतुवागढी -८ का स्थानीय अनिल खड्काले बताए ।

उक्त मागहरु पूरा नभए असोज १३ गते देखि गाडी अवरोध गरिने स्थानीयले चेतावनी दिएका छन् ।