हतुवागढीका एक मात्र स्वतन्त्र उम्मेदवार काजिराम बस्नेतले पाए ‘धारा’ चुनाव चिन्ह

–अर्जुन राई अपहेलित,

घोडेटार । भोजपुरको हतुवागढी गाउँपालिका–१ का वडाध्यक्षमा स्वतन्त्र उम्मेदवार काजिराम बस्नेतले ‘धारा’ चुनाव चिन्ह पाएका छन् ।

शनिबार गरिएको चुनाव चिन्ह वितरणमा बस्नेतले ‘धारा’ चिन्ह पाएका हुन् ।

नेपाली कांग्रेसबाट बागी उम्मेदवारी दिएका बस्नेतलाई धारा चुनाव चिन्ह प्रदान गरिएको स्थानीय निवार्चन कार्यलय घोडेटारका सहायक अधिकृत राज कुमार शाक्यले जानकारी दिए ।

हतुवागढीमा पाँच दलले सहभागिता जनाएका छन् । हतुवागढी ९ को वडाध्यक्षमा मंगोल नेशनल अर्गनाइजेशनको तर्फबाट अमर राईले उम्मेदवारी दर्ता गराएका छन् । त्यस्तै हतुवागढी–९ मा नेपाली कांग्रेसको तर्फबाट शान्तिमाया राईले वडाध्यक्ष पदमा उम्मेदवारी दर्ता गराएकी छिन् । ९ वटा वडामध्ये शान्तिमाया एक मात्रै महिला वडाध्यक्षका उम्मेदवार हुन् ।

त्यस्तै जनता समाजवादी पार्टी नेपालले पनि ३ वडामा उम्मेदवारी दर्ता गराएको छ । हतुवागढी १ र २ वडामा अध्यक्ष र वडा नम्बर ५ मा प्यानलै जसपाका उम्मेदवार रहेका छन् । नेकपा माओवदीले हतुवागढी ८ र ९ नम्बर वडामा प्यानलै उम्मेदवारी दर्ता गराएको छ भने अन्य केही वडामा नेपाली कांग्रेस सँग गठबन्धन गरेको छ ।

नेकपा एमाले र नेपाली कांग्रेसले ९ वटै वडामा उम्मेदवारी दर्ता गराएको छ । अघिल्लो निर्वाचनको तुलनामा यस पटक उम्मेदवारको रुपमा युवा वर्गको सहभागिता रहेको छ ।