कथाकार म्यामराज राईको लघुकथा संग्रह ‘हाम्रो बाटो’माथि विमर्श

घोडेटार । हतुवागढी पुस्तकालय तथा इश्वरमान राई प्रतिष्ठानले कथाकार म्याम राज राईको लघुकथा संग्रह ‘हाम्रो बाटो’ माथी विमर्श गरेको छ ।

शनिबार भोजपुरको हतुवागढी-१ सगरमाथा माविको सभाहलमा कार्यक्रम आयोजना गरि उक्त लघुकथा संग्रहमाथी साहित्यिक विमर्श गरिएको हो ।

हतुवागढी गाउँपालिका अध्यक्ष प्रेम कुमार राईको प्रमुख आतिथ्यतामा सम्पन्न कार्यक्रममा २५ जना भन्दा बढीको उपस्थिति रहेको थियो ।

कार्यक्रममा पालिका अध्यक्ष राईले कथा संग्रहमा भएका कथा तथा ‘हाम्रो बाटो’ प्रवृतिले हाम्रो यथार्थ तस्विर खिचेको बताएका छन् ।

कथाकार म्यामराज राईको उक्त लघुकथा संग्रह प्रकाशनले हतुवागढीमा लेखन साथै पठन संस्कृतिको विकासमा उर्जा थप गरेको आयोजकले जनाएको छ ।

कार्यक्रममा कथा संग्रहका विभिन्न पक्षबीच छलफल तथा टिप्पणी गरिएको हो । उक्त लघुकथा संग्रहमाथी कवि तथा साहित्यिक पत्रकार प्रकाश दिप्साली, अध्यापक प्रकाश बान्तावा र अध्यापक मञ्जु नेपालका बीच सामुहिक अन्तरक्रिया समेत गरिएको हो । उक्त अन्तरक्रिया कार्यक्रमको सहजीकरण गजलकार एलबि प्रधानले गरेका थिए ।

अन्तरक्रियाको क्रममा कवि एवं पत्रकार प्रकाश दिप्सालीले लघुकथा संग्रह प्रकाशन पछि कथाकार म्यामराज राईप्रती पाठकको अपेक्षा बढेको बताए ।
इश्वरमान राई प्रतिष्ठानका अध्यक्ष इन्द्र थापाको संयोजकत्वमा सम्पन्न उक्त विमर्श कार्यक्रममा पूर्व सांसद माननीय धनहर्क राईको विशेष आतिथ्यता रहेको थियो । कार्यक्रम हतुवागढी गाउँपालिका उपाध्यक्ष सुनिता किराती, अग्रज कवि एवं उपन्यासकार चन्द्र राई ‘तारा’, पात्लेपानी कला साहित्य प्रतिष्ठानका संस्थापक अध्यक्ष एवं गजलकार विश्वजित चाम्लिङ लगायत स्थानीय जनप्रतिनिधिहरुको समेत उपस्थिति थियो ।

साहित्यिक यात्रामा कथाकार म्यामराजको बाटो: “हाम्रो बाटो”
भोजपुरको हतुवागढी गाउँपालिका वडा नं. ६ होम्ताङमा जन्मिएका म्यामराज राई (जन्म: २०४४) हाल वैदेशिक रोजगारको क्रममा जापानमा रहेका छन् ।

स्नातक तहसम्मको अध्ययन पूरा गरेका राई आदिवासी जनजाती लेखक/साहित्यकार महासंघ,जापान शाखाका सचीवको जिम्मेवारीमा छन् । आठ वर्ष जापनमा बिताइसकेका राईले त्यही रहेर डेढ वर्ष जापानी भाषालय र दुई वर्ष प्राविधिक शिक्षालय अध्ययन गरे ।

वैदेशिक रोजगारीमा रहेरै पनि साहित्य प्रती निरन्तर कर्म गरिरहेका कथाकार राई साहित्य पोष्ट साप्ताहिक लघुकथा प्रतियोगिता पच्चिसौं हप्ता(२०७८)मा उत्कृष्ट तीनमा पर्न सफल भए । त्यसका साथै प्रदेश एक स्तरीय लघुकथा प्रतियोगिता(२०७८) मा द्वितीय र प्रथम बृहत् ऐतिहासिक टुक्का प्रतियोगिता(२०७८) मा प्रथम बनेका राईले साहित्यमा बलियो जग तय गरेका छन् ।

वि.सं. २०६२ सालमा ‘आशिर्वाद’ शीर्षकमा पहिलो लघुकथा लेखे सँगै साहित्यिक यात्रा प्रारम्भ गरेका राईले २०७५ सालमा हतुवाहेराल्ड अनलाइनबाट ‘म्यानेजर’ लघुकथा प्रकाशित गरे ।
यो सँगै कथाकार राईले लघुकथा संग्रह “हाम्रो बाटो २०७९” कृति प्रकाशित गरेका हुन् ।

यसरी साहित्यिक यात्राको लघुकथा लेखनमा बलियो छाप बसाएका राईलाई खिम्दुङ राई कल्याणकारी समाज, भोजपुर(२०७८)ले प्रशंसा पत्र प्रदान र लघुकथा श्रव्य दृश्य प्रतिष्ठान (२०७८) ले उत्कृष्ट लघुकथाकारको रुपमा सम्मान गरिसकेको छ । यसका साथै कथाकार राईलाई नमस्ते आधुनिक लघुकथा मञ्च (२०७८) र हाम्रो लघुकथा पाठशाला(२०७८)ले आफ्नो वार्षिकोत्सवको अवसरमा सम्मान गरेका छन् ।