धरानमा जुवा खेलिरहेका भोजपुर आमचोकका एक वडाध्यक्ष र शिक्षक सहित ११ जना पक्राउ

श्रावण ९, भोजपुर । सुनसरीको धरानबाट एक वडाध्यक्ष, शिक्षक सहित ११ जनालाई पक्राउ परेका छन् ।

सोमबार साँझ इलाका प्रहरी कार्यालयको प्रहरी टोलीले धरान-१० पुतली लाइन स्थित एक बेकरी क्याफेमा जुवा खेलिरहेको अवस्थामा उनीहरूलाई पक्राउ गरेको हो ।

पक्राउ पर्नेमा भोजपुर जिल्ला आमचोक गाउँपालिका वडा ६ का अध्यक्ष बमबहादुर बस्नेत, लक्ष्मी माध्यमिक विद्यालय पाङ्चाका शिक्षक अशोक राई छन् ।

उनीहरूसँगै पक्राउ पर्नेहरूमा राजेन्द्र श्रेष्ठ, अशिष कुमार राई, विपिन गुरुङ, भरत थापा, जस बहादुर राई, कुमार राई, सागर राई, कविराज राई, रोहित श्रेष्ठ रहेको जिल्ला प्रहरी कार्यालय सुनसरीले जनाएको छ ।

उनीहरूलाई मङ्गलबार (आज) नै म्याद थप गरिएको अनुसन्धान कार्य अघि बढाइएको छ । धरानमा वडा १३ वडा १५ र वडा १६ को एक-एक घरमा व्यवसायीक रूपमा दैनिक जुवाको खेल हुने भएकाले उक्त जुवा अड्डाहरूमा धरान बाहिरका जुवाडेको पनि जमघट हुने गरेको छ ।