आज प्रदेश एकको नाम राख्ने तयारी, परिस्थिति बिग्रन सक्ने भन्दै दलहरूको गोप्य प्रयास

विराटनगर । प्रदेशसभाको पहिलो कार्यकालमा नामकरण गर्न नसकेको प्रदेश १ ले ‘सरप्राइज’ दिने तयारी गरेको छ ।

आजको प्रदेशसभा बैठकमा नामकरणको प्रस्ताव पेश गर्ने तयारी हुँदा प्रदेशको नाम ‘कोसी’ राख्न दलहरुबीच सहमतिको प्रयास जारी छ ।

प्रदेशसभाको बैठकमा एउटा मात्रै नामको प्रस्ताव पेश हुन्छ की एक भन्दा बढी भन्ने विषयमा दलहरूले केहि पनि बताएका छैनन् । परिस्थिति बिग्रन सक्ने भन्दै दलहरूले यो विषयलाई गोप्य राखेका छन् ।

नेपालको संविधानमा प्रदेशको नामकरणको टुंगो लगाउन प्रदेशसभाको दुई तिहाइ मत आवश्यक पर्छ । प्रदेश १ मा ९३ जनाको संसद् छ । जसमध्ये नामकरणको टुंगो लगाउन ६३ जना सांसद चाहिन्छ ।

प्रदेश १ प्रदेशसभामा एमालेका ४०, काँग्रेसको २९, माओवादीको १३, राप्रपाको ६, नेकपा एसको ४ र जसपाको १ जना सांसद छन् । सत्तापक्ष र विपक्षमा विभाजित हुँदा कसैको पनि दुई तिहाइ मत पुग्न सक्ने सम्भावना कम रहेको कारण सर्वसहमतिमा नामकरणको टुंगो लगाउने तयारी गरिएको नेताहरू बताउँछन् ।

प्रदेशसभाको बैठक बिहान ११ बजेका लागि बोलाइएको छ ।

अघिल्लो प्रदेशसभामा प्रदेशको नाम कोसी, सगरमाथा, विराट, कञ्चनजङ्घामध्ये एउटा राख्ने तयारी भएको थियो ।