बैंकले ढिला गरेपछी आफै सामाजिक सुरक्षा भत्ता बाँढ्दै वडाध्यक्ष थापा

कार्तिक ६, पात्लेपानी । भोजपुरको हतुवागढी -८ का वडाध्यक्ष प्रेम बहादुर थापाले व्यक्तिगत रुपमा सामाजिक सुरक्षा भत्ता वितरण गरेका छन् ।

घोडेटार स्थित प्रभु बैंकले वृद्ध वृद्वा, अपांग तथा एकल महिलाहरुका लागि सामाजिक सुरक्षा भत्ता वितरणमा ढिलाई गरेपछि वडाध्यक्ष थापाले आफै वितरण गरेका हुन् ।

आइतबार ८ नं. वडाकार्यलय देखि वितरण सुरुगरेका थापाले पायक पर्ने स्थल तथा घरैमा पुगेर भत्ता वितरण गरेका हुन् । गाउँपालिले दशै अघि नै बैंकमा पेस गरेपनि बैंकले अझै वितरण गर्न नसकेको वडाध्यक्ष थापाको भनाइ छ ।

सेवाग्राहीले भत्ता वितरणको अत्याधिक माग गरे पछि बैंक बाट आएको रकम आफू लिने सर्तमा ८ नम्बर वडा भरिका १०५ जना जेष्टनागरिक, २० जना एकल महिला, ४ जना अशक्त र ८ जना दलितलाई भत्ताको रकम वितरण गरिएको वडाध्यक्ष थापाले जानकारी दिए ।

वडाध्यक्ष थापा भन्छन्, ‘चाडपर्वको समयमा वृद्ववृद्वा, अशक्तहरुलाई पैसाको खाँचो हुन्छ । बैंकले वितरणमा किन ढिलाइ गरेको कुनै जानकारी छैन । उँहाहरुको माग अनुसार बैंकबाट आएको आफू लिने सर्तमा व्यक्तिगत तथा केही सापटी लिइ रकम उपलब्ध गराई वितरण गरेको हुँ ।’