मुख्यमन्त्रीका स्वकियबाटै मौन अवधिको अवज्ञा, सामाजिक सञ्जालमा प्रचारबाजी

भोजपुर । प्रतिनिधी तथा प्रदेशसभा सदस्य निर्वाचनको स्थिर समय (मौन अवधि) सुरु भएपनि भोजपुरमा आचारसंहिता विपरीत प्रचारबाजी बढेको छ । प्रदेश १ का मुख्यमन्त्री तथा गठबन्धनका उम्मेदवार राजेन्द्रकुमार राईका स्वकिय सचिव भद्र पराजुलीले सामाजिक सञ्जाल फेसबुकमा भोट मागेका हुन् ।
पराजुलीले मतपत्रको नमूनासहित मुख्यमन्त्री राईका लागि मत माग्दै फेसबुकमार्फत सार्वजनिक गरेका छन् । निर्वाचन आयोगले विहिबार राती १२ बजेदेखि मौन अवधि सुरु भएको भनेपनि उनले आचारसंहिताको उल्लघंन गर्दै भोट मागेका हुन् ।
पराजुलीले गरेको अवज्ञामाथि लिखित उजुरी आएपछि आवश्यक कारबाही अगाडि बढाईने प्रमुख जिल्ला अधिकारी हरिप्रसाद घिमिरेले जानकारी दिए । भने, ‘यस स्थिर अवधिमा पराजुलीले गर्नुभएको सामाजिक सञ्जालमा आएको प्रचारात्मक अभिव्यक्तिको लिखित उजुरी आउने वितिक्कै हामी आवश्यक कारबाही अगाडि बढाईहाल्छौँ’
यसअघि पनि गत कात्र्तिक २६ गते पराजुलीले प्रतिनिधीसभाका स्वतन्त्र उम्मेदवार दिलिप कुमार खतिवडामाथि पनि ज्यान मार्ने धम्किसहित हातपात गरेका थिए । साल्पासिलिछो गाउँपालिकाको दोभानेबाट घरदैलो गरि फर्केर साँझमा खाना खादँै गर्दा उनले हातपात गरेका थिए ।
मौन अवधि चलिरहँदा भोजपुरमा सामाजिक सञ्जालको आचारसहिंता विपरीतका सामाजिक सञ्जालमार्फत प्रचारबाजी बढेको छ । विशेषगरि राजनीतिक दलको झण्डा र चुनाव चिन्ह अंकित उम्मेदवारका विभिन्न प्रचारमूलक दल र उम्मेदवारहरुको समर्थन जनाउँदै आचारसंहिता विपरीत भोट माग्ने क्रम चलेको छ ।
मौन अवधिमा राजनीतिक दलका कार्यक्रम, समाचार, तश्विर, चुनाव चिन्ह झण्डा, ब्यानर, श्रव्यदृश्य समेटिएका प्रचारमूलक सामाग्रीको कुनैपनि माध्यमबाट प्रचारप्रसार नगर्न र अवज्ञा गरे २५ हजारसम्म जरिवाना हुने आयोगले यसअघि नै निर्देशन जारी गरीसकेको छ ।