प्रधानमन्त्री देउवाले पत्रकार सम्मेलन गर्दै

काठमाडौं । प्रधानमन्त्री तथा नेपाली कांग्रेसका सभापति शेरबहादुर देउवाले बुधबार दिउँसो ३ बजे पत्रकार सम्मेलनको आयोजना गरेका छन् ।

स्थानीय तह निर्वाचनबारे पार्टीले गर्न लागेको ‘एक महिने अभियानबारे जानकारी दिन देउवाले पार्टी कार्यालय सानेपामा पत्रकार सम्मेलनको आयोजना गरेका हुन् ।

पत्रकार सम्मेलनमा उपसभापतिहरू, महामन्त्रीहरूलगायत पार्टीका शीर्ष नेताको उपस्थिति रहने छ । कांग्रेसले स्थानीय तहका लागि ‘घरघर जाउँ, कांग्रेस जिताउँ’ नारा तय गरेको छ ।
सोही नारामा आधारित भएर अभियान चलाउन लागिएको र त्यसको घोषणा सभापति देउवाले गर्ने कांग्रेसका मुख्य सचिव तथा राष्ट्रिय सभा सदस्य कृष्ण पौडेलले जानकारी दिए ।

स्थानीय तह निर्वाचनको मिति घोषणा भएसँगै अन्य राजनीतिक दलहरूले पनि स्थानीय तह लक्षित निर्वाचन कार्यक्रमलाई तीव्रता दिएका छन् ।