भोजपुरको होम्ताङमा ६ दिने साकेन्वा सिली मेला २०८१

घोडेटार । भोजपुर जिल्लाको दक्षिणी क्षेत्र हतुवागढी गाउँपालिकास्थित होम्ताङमा साकेन्वा सिली मेला आयोजना गरिएको छ ।

साकेन्वा संरक्षण, पूजा समिति तथा साकेन्वा मेला सिली कार्यक्रम उपभोक्ता समितिको आयोजना साथै हतुवागढी गाउँपालिका वडा न ५ र ६ काे प्रायोजनमा उक्त मेलाको आयोजना गरिएको हो ।

बिहिबार हतुवागढी गाउँपालिका अध्यक्ष प्रेम कुमार राईकाे प्रमुख आतिथ्यतामा किरात राई जातिको साकेन्वा सिली प्रदर्शन गरी कार्यक्रमको उद्घाटन गरिएको हो । कार्यक्रम उद्घाटन सङ्गै साविक होम्ताङ गाविस अन्तर्गत वडा स्तरीय पुरूष तथा महिला फुटबल प्रतियगिता सुरु गरिएको छ ।
आगामी कार्तिक २६ गते सम्म सञ्चालन हुने सिली मेलाको अवसर पारेर सिली नाच्ने सङ्ख्या वृद्धी गर्न सिली प्रतियोगीता समेत आयोजना गरिएको ५ नं वडाअध्यक्ष सुरेश कुमार राईले बताए ।

सोही अवसरमा साकेन्वा पुज्ने पुजारी (नाक्छोङ) हरुलाई किराती संस्कार अनुसार शिरमा सेतो फेटा गुठाएर सम्मान गरिएको थियो ।

त्यस्तै हतुवागढी गाउँपालिकै वडा नं ८ स्थित विद्यापोखरीमा साविकको वडा स्तरीय पुरूष तथा महिला भलिबल प्रतियगिता जारी रहेको छ ।
हतुवागढी ८ युवा समूहद्धारा आयोजित उक्त प्रतियोगिता कार्यक्रम हतुवागढी खेलकुद विकास समितिको अध्यक्ष बालकुमार राईले प्रादेशिक रेफ्री द्वय तारा मगर र वसन्त राईलाई बल हस्तान्तरण गरी उद्घाटन गरिएको हो ।

प्रतियोगितामा पुरूष तर्फ ३२ र महिला तर्फ ११ समूहको सहभागिता रहेको आयोजक समिति अध्यक्ष नगेन्द्र राईले जानकारी दिएका छन्।