एमाले प्रवेश गर्न लागेका रंगेलीका मेयर अग्रवाललाई केपी ओलीले स्वागत गर्ने

विराटनगर । माओवादी केन्द्रबाट मोरङको रंगेली नगरपालिका प्रमुख बनेका (मेयर) दिलिप बगडिया (अग्रवाल) एमाले प्रवेश गर्ने भएका छन् ।

एमालेले आज बिहान ११ बजेदेखि गर्ने जनसभालाई एमाले अध्यक्ष केपी शर्मा ओली रंगेलीमै पुगेर सम्बोधन गर्ने र सोही सभामा मेयर बगडियालाई पार्टी प्रवेश गराउन लागेको हो ।

माओवादी केन्द्रबाट निर्वाचित बगडियासहित उपाध्यक्ष केशवकुमारी खराल तथा वडाध्यक्षहरू एमालेमा प्रवेश गर्न लागेका हुन् ।

माओवादी र एमालेको एकता टुटेपछि बगडिया एमालेसँग नजिकिएका थिए । एमाले प्रवेश गर्न लागेपछि हिजो माओवादी केन्द्रले मेयर अग्रवाललाई कारबाही गरेको थियो ।

माओवादीले उनलाई पार्टीबाट निष्कासन गर्दै दुई महिनापछि रिक्त हुन लागेको मेयर पदबाट हटाउन निर्वाचन आयोगलाई पत्राचार गर्ने निर्णय गरेको थियो । माओवादी केन्द्रका बैठक छल्दै आएका उनलाई माओवादीले स्पष्टीकरण सोधेको थियो । तर, उनी आफू पार्टीमा प्रतिबद्ध रहेको जवाफ दिँदै आएका थिए ।

बगडिया मोरङमा माओवादी केन्द्रबाट निर्वाचित हुने एक मात्र पालिका प्रमुख हुन् ।