हतुवागढीको होम्ताङमा वडा स्तरीय पुरुष/महिला भलिबल प्रतियोगिता सुरु
- समाचार
- November 24, 2023
घोडेटार । भोजपुरको हतुवागढी गाउँपालिका स्थित होम्ताङमा खुल्ला भलिबल प्रतियोगिता सुरु भएको छ ।
मंसिर ३ गते देखि जारी रहेको साकेन्वा उधौली सिली मेला २०८० को अवसरमा पुरुष तथा महिला भलिबल प्रतियोगिता आयोजना गरिएको हो ।
मेलाको छैठौं दिन शुक्रबार (आज) पुरुष भलिबल प्रतियोगिता सुरु गरिएको हो । प्रतियोगितामा आज पुरुष तर्फ दुई खेल सम्पन्न भएको छ । पहिलो खेलमा हतुवागढी ६ होम्ताङ बि टिम लाई हराउँदै आमचोक गाउँपालिका २ अघिल्लो चरण प्रवेश गरेको छ । त्यस्तै दोस्रो खेलमा हतुवागढी १ घोडेटारलाई हराउँदै हतुवागढी ६ होम्ताङ ए भलिबल टिम अद्दिल्लो चरणमा प्रवेश गरेको छ ।
उक्त प्रतियोगितामा पुरुष तर्फ २४ भलिबल टिम र महिला तर्फ १२ भलिबल टिमको सहभागिता रहेको छ । महिला र पुरुष तर्फको खेलहरु शनिबार (भोलि) बिहान ७ बजेबाट सुचारु हुने भएको छ ।
हतुवागढी गाउँपालिका वडा नं. ५ र ६ को संयुक्त प्रायोजन र साकेन्वा संरक्षण तथा पुजा समिति हतुवागढी ५ द्धारा आयोजित साकेन्वा सिली मेलाको अवसरमा उक्त प्रतियोगिता आयोजना गरिएको हो ।
प्रतियोगितामा पुरुष तर्फ विजेता समूहले रु. ७५ हजार र उपविजेता समूहले रु. ३५ हजार नगद पुरस्कार सहित प्रमाण पत्र प्राप्त गर्नेछन् । साथै सेमिफाइनल पुग्न सफल दुई टिमलाई नगद रु. ५ हजार सान्त्वना पुरस्कार सहित प्रमाणपत्र प्रदान गरिने छ ।
त्यस्तै, महिला भलिबल प्रतियोगिता तर्फ विजेता समूहले रु. ३५ हजार र उपविजेता समूहले रु. २० हजार नगद पुरस्कार सहित प्रमाणपत्र प्राप्त गर्ने छन् भने सेमिफाइनल खेल्ने दुई टिमलाई नगद रु. २५ सय र साथमा प्रमाण पत्र सान्त्वना स्वरुप प्रदान गरिने आयोजकले जनाएको छ ।
मंसिर ३ गतेदेखि ११ गतेसम्म मेला अवधीभर प्रत्येक साँझ आमन्त्रित एवं स्थानीय कलाकारको गायन, नृत्य प्रस्तुती रहने आयोजकले जनाएको छ । काठको रोटे पिङ, लिङ्गे पिङ साथै स्थानीय उत्पादनको प्रदर्शन तथा बिक्री वितरण मेलाको प्रमुख आकर्षण रहेको छ ।